Турција и Македонија – пример за континуитет во пријателството и културната соработка
Министерот за култура на Република Македонија, Роберт Алаѓозовски оствари средба со амбасадорката на Република Турција во нашата земја, Тулин Еркал Кара. На средбата, која се одвиваше во исклучително пријателска и позитивна атмосфера, oбете страни ја истакнаа и ја оценија високо досегашната долгогодишна културна соработка, која се одвива во континуитет, како и потребата таа постојано да се унапредува.
Соговорниците се согласија дека треба што поскоро да се продолжи и финализира процесот на отворање на културните центри на Македонија во објект на истанбулскиот плоштад Таксим и на Турција во Куршумли Ан во Скопје.
Амбасадорката Кара се интересираше и за изведбата на објектот на Турскиот театар, при што од министерот Алаѓозовски беше информирана дека Министерството и новата влада се залагаат да отстранат сите пречки и причини за досегашните доцнења на изведбата и ќе настојуваат Турскиот театар да ги добие што е можно побргу условите што ги заслужува.
Освен за динамичната соработка во повеќе области, министерот Алаѓозовски и амбасадорката Кара разговараа и за посетата на турскиот министер за култура во Македонија кон крајот на летото, што ќе биде одлична можност за продлабочување на културната соработка помеѓу двете земји.
